城中鏡：李秀恒魚賓 巨吞拿齊齊歎
羅台秦未見過咁大條吞拿魚，擺出趣怪甫士留影。
因為有朋友話想食刺身，廠商會副會長Eddy李秀恒就索性空運一條足有成個人咁高、重達六十八公斤嘅巨吞拿魚到港。呢條吞拿魚來自東京築地，運抵香港一間日式餐廳後，Eddy即call齊成班廠商會好友開餐，包括副會長陳淑玲、徐炳光、楊志雄、德國寶老闆陳國民、前行政總裁梁世華同會董羅台秦等二十個老友大快朵頤，用盡煎、炒、煮、炸加刺身方式烹調，歎足一晚。
羅台秦未見過咁大條吞拿魚，擺出趣怪甫士留影。
日本岡山水蜜桃正值當造，入口清脆爽甜。（被訪者提供）
李秀恒（右二）空運勁量級吞拿魚到港，call齊廠商會副會長徐炳光（右一）、楊志雄（左二）、陳國民（中）同玩具大王陳明耀（左一）大快朵頤。
巨魚「霸」晒成張壽司吧枱，眾人一睇，無不嘩然。「展覽」完畢，刺身師傅手起刀落，花二十分鐘就劏好條魚，魚腩部分最肥美，做刺身一流；魚肩部分就炮製成香草吞拿魚燒，再加埋魚扒、魚湯、柚子吞拿魚沙律同魚手卷等。Eddy食得招積，將魚骨邊嘅魚碎刮出嚟，加入京葱、海苔、沙律汁等，塗上法國麵包食，正斗到極。羅台秦就大讚新鮮刺身味道零舍鮮甜，拖羅部位入口即溶。徐炳光都勁讚魚腩及半魚腩部分最嫩滑，回味無窮。
日本取經盼建地標工廈
飯後果就係空運到港嘅日本岡山水蜜桃，Eddy話呢款水蜜桃正值當造，果汁香濃，呢個月唔食，就要等到明年先有嘞，安排真係周到。何解佢心情咁靚？原來佢日前去日本東京同大阪考察當地建築返港，為活化葵涌一幢工廈取經，佢話打破框框吸取新建築特色，思維豁然開朗，希望打造一幢具地標性嘅工廈。收穫咁豐富，值得擦餐勁啦。
