政壇：搞搞政：林奮強插鬍鬚曾守財奴

林奮強接受機構訪問、論及公共財政時話，政府沿用多年嘅「政府開支佔本地生產總值兩成」根本就唔應該係硬指標，外國亦唔會視為金科玉律，係得鬍鬚曾一直盲目跟從。佢仲引述提出積極不干預理財政策嘅夏鼎基嘅說話，要規定公營部門相對體積嘅最高極限，事實上係唔可能嘅。

鬍鬚曾成日都話要量入為出，林奮強話量入為出嘅理財方式極其量都只係一個管帳人，要成為優秀嘅財務總監，就應該盡量運用財政資源去為香港帶嚟最大收益，暗踩鬍鬚曾只係識望住盤數嘅守財奴。林奮強仲話麥高樂亦曾講過，相信市民寧願享有更佳嘅醫院、學校同社會服務，藉此分享香港經濟繁榮嘅成果，都唔想見到財政儲備不斷增加至超越審慎水平，變成「可笑的吝嗇」。

林奮強又話喺鬍鬚曾嘅財政管理之下，香港正正就係應使不使，唔應使嘅反而係咁倒錢落海。就好似政府成日成立啲預付式基金或注資去公營機構，以為咁就可以當自己有增加開支，但公營機構因法例所限係唔能夠自行增加服務或開支，結果就令呢啲獲注資嘅機構成為無意義嘅小金庫。所以佢都係覺得，政府應喺醫療、教育、長者福利等社會服務加大投資、培訓人才，先有利於香港嘅將來。