政壇：楊釗講粗口要睇場合
設計圖片及對白
因為一位老師、一句粗口，竟然引發近三千人喺旺角行人專用區街頭互鬧，附近商舖要落閘，暫時唔做生意，有學者分析話呢種情況反映咗「香港病了」，仲形容為有排冇得醫。老實講，究竟可以點醫呢？真係冇人知。
設計圖片及對白
社會上對今次事件起爭議，咁究竟商界對粗口文化又點睇呢？尋日喺一個活動見到中華總商會會長楊釗，佢好老實話，如果話畀人聽咁大個人一句粗口都未講過，咁就擺到明呃人啦，而佢自己有時都會因為對一啲事睇唔過眼而講粗口，總之佢認為講粗口要視乎乜嘢場合，如果係公眾場合，又或者喺細路面前，當然唔應該講。換言之，即係有時佛都有火喇！
「要當對方係屋企人」
講番前日場旺角街頭大罵戰，本身係佛教徒嘅楊釗認為，大家可以有唔同意見，但應該視對方為自己屋企人，有乜嘢唔啱傾到啱。佢跟住又話：「就好似你爸爸、媽媽同你都會有唔同意見，例如睇電視都可能有分歧，但唔一定要砌對方吖嘛。」
同場又見到做廠多年，見盡各階層人士嘅工總主席劉展灝，佢話其實粗口呢樣嘢基本上活喺生活四周，例如喺茶餐廳食飯、坐巴士返工、行街購物都好可能聽到，根本無需要咁大驚小怪，只不過講粗口嘅人係一名老師，大家先咁大反應。總之佢就覺得警方唔應該批准喺行人專用區搞論壇，因為旺角已經地方淺窄，搞大型論壇唔止令雙方產生摩擦，仲會影響附近商戶生意添！
