SUN搞作：少膽虫手記：回收少膽虫：
「政棍下台！」抬頭一望，只見辦公室外面有好多員工舉牌嗌口號。自從少膽虫下令裁員之後，不滿接踵而來，向來壹全霉都開放、開明地處理員工意見嘅，既然大家有不滿，少膽虫都唔介意畀機會大家宣洩一下情緒。大家都唔知，為咗幫淫黎打……呢份工，少膽虫已經拚上廿年青春！所謂嘅裁員、合併，其實只係一個過程，喺自由市場入面，條虫定期幫《爛果》排毒，而唔係一次逼爆堆填區，係實踐緊社會責任咋！
世態炎涼，大家睇到嘅，都唔係實相。正如有老師只係講咗個「拂」字，就畀香港公安點名批鬥，但全世界都忽略咗人哋一介女流「勇武」挑釁西環勢力。君不見誠信首領上台之後，成堆indie流氓出晒嚟夾band，仲以愛為名，唔理你想唔想學，夾硬搵成班青年貼身同你發揚中國武術。大家又有無諗過，少膽虫同嗰位老師一樣，只係想犧牲自己以成全大眾？既然大家咁唔滿意裁員，何不嘗試文革式批鬥少膽虫，等條虫被淫黎「自動回收」，到時肥豪fing春蘇上晒位，到時你哋咪可以話點就點囉！大家又有無諗到呢點？
