SUN奇古怪：SUN潮語：【萌】
潮語「萌」其實同「萌芽」無乜直接關係，不過就同「諗」有關。「萌」照字面解就係植物由種子開始發芽生長嘅時期，但係「萌」用作潮語，就係解對一啲人物或事物嘅迷戀，諗到不能自拔嘅地步。
毛主席主張消滅敵人於萌芽階段，呢個亦係幾十年嚟共產黨慣用對付敵人嘅方法。時至今日，甚至連對付自己嘅人民，都係會毫不手軟咁着手打擊。香港作為祖國神聖領土一部分，又點能夠獨善其身？喺一國漸變一制嘅大勢下，呢種戰術亦用到香港之上。就以佔中為例，未開始就被親共人士、左派團體同報章全面攻擊，最近香港負責公安事務嘅警方，被問到會否召喚解放軍對付佔中，更無直接否認，簡直係嚇鬼兼帶頭破壞警隊政治中立。香港再被港共咁搞落去，唔好話消滅於萌芽時期，遲啲分分鐘可能連諗吓都唔准！
迷戀嘅對象仲大多數唔係真實存在嘅東西，例如係動漫人物，或電腦遊戲中嘅角色。「萌」係嚟自日語，原字係萌え（音：Moe），初時係形容沉迷日本動漫電玩（ACG)嘅宅男一種思想行為，佢哋「萌」到甚至幻想跟漫畫中虛擬角色談戀愛。後來經互聯網散播，今時今日「萌」已經轉化成為迷戀偶像嘅代名詞。但嚴格嚟講，係某幾種風格嘅異性，先會令人「萌」，例如係一啲cosplay打扮、女僕造型、lolita公主打扮或經常如少女漫畫女仔般CHOK可愛嘅女仔，至會令一眾宅男「萌」起上嚟。喺香港今時今日，「萌」已經超越咗動漫嘅世界，一眾模當街互摸接吻甚至漏月經，也會令香港宅男「萌」。香港有個社運組織經常標榜「文化抗共」，計我話，不如搞「萌化抗共」，搵啲索女充當社運女神，吸引一眾隱蔽青年上街抗爭，抵抗土共「愛字堆」，我相信絕對可以一舉消滅陳淨心之流。相信正義聯「萌」應該有市場，否則某黨就唔使選個港姐做主席……Right？
