政壇：搞搞政：越南歎海鮮根叔被劏一頸血
設計圖片及對白
立法會前漁農界代表黃容根係業內老行尊，但好熟悉香港行情嘅根叔，早前去越南旅行，順道試吓當地海鮮，竟然畀越南嘅魚檔劏到一頸血，佢哋食嘅海鮮竟然比香港嘅收費仲要貴一倍多，根叔今次真係畀啲蝦兵蟹將激親囉。
設計圖片及對白
根叔早前同一班漁農界朋友去越南旅遊，遊北越下龍灣時，佢同一眾團友本來諗住坐喺三艘小船上歎杯茶，食吓海鮮。當地除咗有船家即捕即煮嘅生猛海鮮外，仲有一啲魚檔任君選擇，但導遊話船家販賣嘅海鮮靠唔住，所以根叔同班朋友就決定去魚檔搵正嘢，仲指吓、點吓柯打咗啲魚、蝦、蟹，結果每人盛惠二千元人仔（人民幣），比香港仲貴一倍。
點解咁失策？根叔話，本來佢已經叫啲朋友唔好買魚檔啲海鮮，因為嗰度賣嘅蟹八成係水蟹，喺香港只會用嚟煲粥，最貴賣七十元一斤，但越南就賣到近二百元一斤，而當地嘅墨魚更比香港賣貴三倍，真係劏得就劏、鋸得就鋸咁話。不過，根叔話最緊要都係成團人一齊玩得開心，唔想大家掃興，最多下次唔再去幫襯囉！
