政壇：鬍鬚曾縮骨連日冇「救」波
主責推動新界東北發展計劃嘅發展局局長陳茂波，最近捲入家人涉囤地利益衝突疑雲，日前其政治助理何建宗又因漏報潛在利益辭職而再掀爭議。有建制派獻計，將發展計劃易帥重新上路，其中一招係成立由司長出任主席嘅獨立委員會，即係要陳茂波嘅上司、財政司司長曾俊華（鬍鬚曾）披甲上陣。然而，鬍鬚曾連日都未見出力「救」波，甚至有人估佢未必肯「接波」添。
倡設獨立委員會
行政會議成員葉劉淑儀近日建議當局考慮為發展計劃成立獨立委員會，由鬍鬚曾或政務司司長林鄭月娥做主席，其後身兼行會成員嘅「三料議員」李慧琼亦話，從發展計劃順利推展角度出發也樂見成立委員會。不過，佢哋搖旗吶喊都冇用，有政界中人話，雖然鬍鬚曾曾出任房屋及規劃地政局常任秘書長（規劃及地政），又係陳上司，救波順理成章，但有「梁粉」就質疑成立委員會嘅成效，仲話有人揚言只要一日陳茂波做局長，就會拉布拖垮當局工作，成立委員會係咪可以解決問題呢？
講到尾，呢場政治風「波」仲有好多變數，啱啱畀人話係大罪人嘅鬍鬚曾，依家見波玩「閃避」，有關人士都冇符喎。
