政壇：新一年立會風高浪急
設計圖片及對白
政府同立法會啱啱完成一個年度嘅工作，政府團隊被評喺醜聞中掙扎，議會都被指喺拉布同流會中蹉跎。尋日幾個黨派代表出席一個電台節目回顧議會過去一年嘅工作，建制派議員坦言過去一年嘅工作唔暢順，前瞻未來，佢哋更加不約而同流露沮喪嘅一面，經民聯嘅林健鋒講到明未來一年議會都唔會風平浪靜；民建聯嘅譚耀宗更話期望立法會風平浪靜係「不切實際」。一句講晒，佢哋預咗嚟緊風高浪急，日子唔好過喇。
設計圖片及對白
撐政府吃足苦頭
林健鋒話，過去一年嘅立法會可謂多事之秋，事關新政府上任以來，雖然領導層有理想有計劃，但喺溝通及籌備方面卻做得不足，搞到政策推行嘅過程唔暢順，矛頭似直指新政府嘅行政表現。建仔嘅譚Sir就將焦點集中喺議會拉布上，佢話議會過去一年運作難嘅根源係拉布成風，搞到議會審議工作受阻，市民對立法會失望，佢仲話喺依家嘅社會背景同政治現實下，期望立法會風平浪靜真係好難囉。
政府弱勢下，建制派飽嘗撐政府之苦，工聯會嘅陳婉嫻就再次同政府拉開距離，佢話自己隔咗四年重返議會，發覺依家嘅立法會同以前好唔同，議會文化有咗重大改變，嗰頭譚Sir話拉布之惡，嫻姐呢頭就話今日議會搞成咁，政府及政黨雙方都要負責任，雖然認同拉布係「無謂」，但都要將政府拉落水。
議會一年嘅表現，市民其實亦各有評分，好心啲建制派議員唔好呢頭攞政治好處，嗰頭又扮民意代表抽水。嫻姐話議會四年變得太多嘅時候，有冇諗過啲議員都變化好大呢？泛民有內訌，建制都枱底過招啫，好難風平浪靜。
