大學宿舍變賓館 監管眼盲正笨官

涉嫌無牌經營賓館嘅違規業主叫浸會大學，賓館寶號叫吳多泰博士國際中心，坐落九龍塘聯福道，黃金地段，靜中帶旺，旅遊度假一流o架，如果無違規嘅話。喂，呢幢設有一百六十四間房間嘅住宿大樓係浸大九七年獲政府批地興建，講明只作高等教育用途，專為訪問學者、研究生及本科生提供非牟利住宿，點知家陣一個屈尾十變咗高回報搵銀用途，其中三成房間靜雞雞劃作豪華客房及套房出租，非牟利變舔舔脷，點講都唔通啦，吓話？

嗱，吳多泰博士國際中心「賓館」嘅新房間價目由七月一日起生效，詳情恕太一叮唔交代嘞，事關大家可以隨手喺旅遊網站搵到，有旅客留言曾經跟旅行團入住過，仲大讚深受內地個人遊旅客及旅行團歡迎添。中心亦待客至上，網頁明目張膽介紹「觀光及導遊服務」，睇嚟呢間無牌賓館已經遠近馳名，唯一唔知嘅係嗰班正牌笨官。

港產官僚究竟點樣監管嘅呢？大學宿舍都可以變身違規客棧，藏身都市叢林嘅無牌賓館咪更加無王管？最離譜嘅係，呢間大學無牌賓館唔係今日至打開門口做生意，本報早於○四年已經踢爆佢哋接街外生意，民政事務總署仲曾經發出警告信添。點知無牌賓館無關門大吉，反而長做長有，究竟係浸大畀錢遮住雙眼當官老爺無到吖，定係官老爺兩眼昏花畀人輕易搵笨呀？如果港產官僚監管瞌眼瞓，以現時各大學府求財若渴嘅辦學理念，話唔定遲啲連大學課室都淪為遊客劏房喎。

之不過咁，港產官僚係就係失職，今次太一叮反而有啲啲咁多同情佢哋，邊個估到為人師表會以身試法吖！尤其係浸大，佢哋一直力爭九龍塘前李惠利校舍用地，其中一個理由就係興建學生宿舍，殊不知，原來佢一邊爭地起新宿舍，一邊將現有宿舍出租街客牟利，喺求財若渴之下新學生宿舍會唔會變新無牌賓館o架？你知啦，發展局局長陳茂波因為囤地自肥而淪為「捱罵的波兒」，大學如果囤地牟利一樣咁乞人憎o架咋。

總之，為人師表係授道解惑，唔係鬥行蠱惑，大學宿舍唔可以無規無矩。至於港產官僚咯喎，一係浸大繼續經營無牌賓館，一係你哋「門常開」關門收檔，自己揀啦，叮！