城中鏡：朱潔儀嚮往古堡婚禮
朱潔儀參加老朋友女兒喺法國古堡舉行嘅婚禮。
近年轉型做畫家嘅前港姐Donna朱潔儀亦有為社區出力，現時擔任東區交通安全大使，而佢早前遠赴法國參加老朋友女兒嘅結婚典禮，藝人林嘉華兩公婆都係座上客。婚禮喺當地嘅古堡舉行，Donna大讚場面浪漫又感動，佢話：「我第一次去古堡參加婚禮，感覺好童話式，相信每個女仔都想喺古堡行禮。我唔介意異地戀，只要大家夾就得，而且我學過法文。」咁喺當地有冇艷遇？佢就話：「好多男士主動同我傾偈囉！不過法國人係比較熱情，鍾意同陌生人傾偈。」
朱潔儀參加老朋友女兒喺法國古堡舉行嘅婚禮。
另外，Donna亦順道喺當地旅遊，喜歡畫畫嘅佢抽空逛羅浮宮欣賞藝術品，佢話：「可惜羅浮宮入面太多人，唔可以慢慢咁睇。」佢話喺出發前有朋友叮囑佢喺歐洲要分外小心，因為當地治安唔好，有次佢獨個兒外出時被一名黑人尾隨，直至佢會合一大班朋友後，對方先知難而退，幸好全程有驚無險。
