政壇：搞搞政：陳健波彈部分直選議員不濟

話說主持人問作為功能組別議員嘅佢，點睇功能組別嘅發展時，佢話：「直選議員當中冇咩人對發展經濟係有興趣，亦對呢方面認識不足，所以呢個階段要有重視經濟發展嘅功能組別喺議會作平衡，等社會唔好全面走向福利主義。佢又直言，依家部分直選議員好不濟，最令佢失望嘅係好多議員為咗個人利益、保得住自己個位就犧牲香港利益，「各政黨睇到將來議席會增加，地區樁腳同聲音都好重要，咁樣一定重地區、輕政府……堆填區係一個好例子，我係區議員都會反對，但立法會要睇嘅係成個香港。」佢仲批評呢啲直選議員咁樣係緣木求魚，長此下去會畀香港人唾棄，又話如果直選制度改善、選得到好嘅議員嘅話，功能組別自然就會冇存在價值。

唔少功能組別都對佔領中環有保留，陳健波亦話講呢個議題要好小心，因為啲人一唔啱聽就會對佢人身攻擊。不過，佢唔講又講，仲用阿仔扭計去形容佔中︰「依家好似一個縱壞咗嘅細路仔要同老竇攞啲嘢，同老竇講如果唔畀就將屋企最值錢嘅嘢打爛佢，我係阿爸就攞藤條fit你幾下！」但佢就覺得佔中好難執行，皆因你阻礙交通，我咪搭地鐵囉，搭個升降機就可以返上寫字樓做嘢，所以如果到最後，其實係對中環冇影響嘅話，盞得個搞字。