政壇：阿毛聲討網絡廿三條連商務局都噏唔出

要鬧人又搞唔清對方叫做乜嘢名，咪即係亂咁鬧囉。商務及經濟發展局日前發表諮詢文件，重新諮詢《版權條例》。泛民主派立法會議員「阿毛」毛孟靜尋日就喺旺角行人專用區舉辦名為「網絡廿三條又嚟？」嘅街頭論壇，批評諮詢文件未有為「戲仿」兩字訂下清晰定義，又冇詳細交代執法細節，要求政府延長諮詢期，等市民同業界可以繼續發表意見。

阿毛批評局長蘇錦樑上任後毫無德政，遲遲唔肯發出新免費電視牌照之餘，如今又要硬推「網絡廿三條」，企圖控制網民意識形態。佢之後愈講愈興奮，話現時政府施政愈來愈差，蘇錦樑嗰個「工商及唔知咩事務局」更加唔知做緊乜，要靠身旁嘅同僚、資訊科技界議員莫乃光出手糾正，話應該係「商務及經濟發展局」先啱。阿毛呢頭至喺立法會提出要求引用《權力及特權條例》徹查港台事件，但嗰頭就唔記得「商務及經濟發展局」全名，當正蘇錦樑冇到。