政壇：波波避風頭 唔講拓東北
陳茂波尋日篇網誌改為討論年底會檢討私人文物保育政策。
成日畀人話淨係識得匿埋喺鍵盤後面打網誌嘅發展局局長「波波」陳茂波，近期捲入涉嫌喺新界東北囤地嘅利益衝突事件，尋日佢篇網誌就一反常態，冇繼續力銷各個新發展區，改為討論年底會檢討私人文物保育政策，唔知係咪怕再惹起討論，所以轉移視線講啲冇咁受爭議嘅話題，定係怕再sell新方案，會畀人話有利益衝突？
陳茂波尋日篇網誌改為討論年底會檢討私人文物保育政策。
檢討保育私人歷史建築
翻查發展局網頁，波波喺過去四個禮拜都係討論與新發展區同開拓土地有關嘅議題，包括上星期講洪水橋新發展區，再之前連續兩個禮拜介紹新界東北新發展區，上個月底就討論開拓土地政策，措詞相當強硬。
不過，尋日就筆鋒一轉，完全避開土地問題，講私人歷史建築保育政策檢討，話最快年底可以展開諮詢，仲話一○年起已經向屋宇署及地政總署等部門發出便箋，透過內部監察機制去監察私人歷史建築業主有冇向政府申請重建，以免呢類建築遭到拆卸，但一如以往，披露嘅新資料唔多，唔知係咪尋日正值民陣發起大遊行叫佢落台，佢怕自己個網誌再成為火頭而低調處理呢？
