政壇：守財奴鬍鬚曾無悔意
設計圖片及對白
財爺鬍鬚曾早前被恒隆地產主席陳啟宗炮轟，理財未能做到應使則使，歷史會證明佢係「大罪人」，鏡頭前嘅鬍鬚曾神態自若、笑笑口咁話自己「心情非常沉重」，好似唔多在乎，但轉個頭就喺尋日發表嘅每周網誌露餡。
設計圖片及對白
鬍鬚曾今個星期以「錢不是萬能」為題，用比平日多逾一倍嘅字數，洋洋二千字羅列上任六年嘅威水史，自稱在任六年一直採用「應使則使」嘅原則，投放喺基建、醫療、教育、社福嘅資源有多冇少，支出增長仲跑贏收入增幅添。
他又話，從來唔會對成熟嘅政策撥款閂水喉，反駁外界對佢一毛不拔嘅指控，仲慨嘆「錢」唔能夠完全解決土地、人手呢方面嘅樽頸，亦無法令一啲「模糊不清，不合理或沒有效益」嘅訴求變得合理，意有所指部分人嘅無理訴求唔抵幫咁話。
不過，睇怕佢墮入咗數字嘅迷思，單憑銀碼上嘅硬指標根本無助了解社會面對緊嘅問題，咁多年來嘅派糖措施只係「頭痛醫頭」，一味致力秉承前朝政府嘅守成政策，以為做大掌櫃只係歎住杯咖啡守住金庫咁簡單，仲學人話會繼續守護港人嘅財富，留一個穩健嘅庫房畀下一代。佢做財爺咁多年，年年估錯數，佢喺網誌仲聲言「熱切期待年底時再一次『估錯數』」，錄得較預期多嘅盈餘。
港人只能自求多福
嘩！咁都得，佢明明係全錯了，竟然仲自我感覺良好之餘亦毫無悔改之意，唔怪得陳啟宗作為重量級「梁粉」都開猛火發炮，睇怕港人只能自求多福，祈求財爺留低嘅庫房唔係一個火藥庫。
講開又講，鬍鬚曾引用咁多數據支持自己嘅理財原則，無非係想將「守財奴」責任卸得乾乾淨淨，如果佢呢套哲學真係行得通，相信歷史總會還佢清白、洗脫「大罪人」嘅惡名，鬍鬚曾如果唔係「身有屎」，又使乜咁急住辯駁吖？
