有朋自遠方來，不亦樂乎。相隔八年，英超冠軍球隊紅魔鬼曼聯再度訪港，掀起一陣紅色旋風。連同目前喺本港參加巴克萊亞洲錦標賽嘅曼城、熱刺及新特蘭，本港球迷有機會一次過同四大英超勁旅近距離接觸，梗係開心喇。不過咁，開心還開心，如果球迷想去大球場欣賞世界一流球技，隨時大失所望o架，點解？大球場泥濘處處，凹凸不平，就算英超球員有一流球技，都未必可以發揮水準喇。

話說近日連場大雨，大球場去水能力唔掂，導致嚴重積水，草地變泥地，泥地變爛地，令遠道而來參賽嘅英超球員步步驚心，苦不堪言。幾位英超領隊異口同聲狂插大球場草地狀況惡劣，根本不適宜比賽，連英國傳媒都譏笑香港大球場好似七十年代嘅英國球場，簡直失禮死人。試諗吓，英超球星個個身價不凡，喺咁嘅大爛地比賽，如果出事邊個賠得起吖？呢，日前熱刺球員維頓漢就因為大球場凹凸不平而受傷，要休息三至四個禮拜，搞到領隊保亞斯火滾，幾乎想唔踢咁滯。

話時話，英超球隊來港作賽，無非都係為咗熱身啫，萬一熱身不成反而受傷，咁就真係得不償失喇。唔怪得曼聯領隊莫耶斯直言擔心大球場草地狀況，如果唔係簽咗約，就唔會畀球隊落場比賽咁話。

最離譜嘅係，大球場蓉蓉爛爛，淪為國際笑話，而負責管理嘅康文署居然闊佬懶理，反而英超聯賽會仲緊張，除咗派員視察草地情況，連英超職員及推廣公司職員亦落場幫手，一方面用鐵叉插窿加快去水，一方面喺草地鋪上膠布保護，認真搞笑。唉，咪話同英國球場比較，就算落後國家嘅球場都好過大球場多多喇！

講起大球場，真係一匹布咁長。早喺十幾年前，大球場重建復開冇幾耐，就因為草皮破爛而備受批評，港府仲控告當時負責管理嘅溫布萊公司管理不善，點知港府敗訴，須向溫布萊公司賠償提早解約嘅二千幾萬元管理費，賠了夫人又折兵。眨吓眼十幾年過去，由康文署接手管理嘅大球場草地唔只冇改善到，反而愈來愈爛，問你服未！

大家應該仲記得，二○○九年香港男子足球隊喺東亞運動會上勇奪金牌，當時嘅特首曾蔭權爵士沾沾自喜，聲稱要全力發展體育，搞好足球運動喎。結果又點呢？咪又係吹水唔抹嘴。老實講吖，港府連一個大球場都搞唔掂，仲學人講發展體育推廣足球，盞笑死人嘅咋，叮！

第一手消息請下載on.cc東方互動iPhone/iPad/Android/Windows Phone Apps