SUN搞作:官場現形記:好膠喎,裙腳星!
香港嘅回收商話處理廢膠時,有一成洋垃圾滯港,推算每年有三十萬噸進口垃圾落入堆填區。點知,環境局局長「裙腳星」反駁指,「數據純屬業界粗略估算,基礎薄弱」,李衞為咗求真,自然去同裙腳星對質一番……
李 衞︰局長,好膠喎!點算好?
裙腳星︰你講咩?做咩無端端話我?
李 衞︰係有人話處理廢膠嗰陣,有好多洋垃圾滯港,仲運咗去堆填區,所以我問你點算!
裙腳星︰佢哋一味靠估,唔可信嘅。
李 衞︰咁如果係真,你又會點處理呢?
裙腳星︰所以我一向都話要擴建堆填區!
李 衞︰嘩,真係名副其實膠到爆!
裙腳星︰做咩又話我?
李 衞︰因為被啲膠塞爆,堆填區先要擴建,咁仲唔係「膠到爆」?唔好咩都爭住認喇!
裙腳星︰@##$$%^^&&