SUN奇古怪：SUN潮語：【愛字堆】

網上最近流傳一段短片，內容係有個疑似親共叫「青年關愛協會」嘅愛國組織，喺旺角西洋菜街行人專區，對在場擺街站嘅法輪功進行挑釁，行為近乎欺凌。期間，有個見義勇為嘅女人，指罵「青關愛」為虎作倀，以愛國為名搗亂香港，更指摘警方處理不當。全段影片全長十幾分鐘，點知有某報記者，唔知點解斷章取義，淨係用咗嗰位女士指罵警察嘅一小段嚟做即時新聞，扭曲成段影片意義。結果，維穩愛國五毛空群而出，又起底又起晒嗰位女士嘅地址，搞到嗰位見義勇為嘅女士反被抹黑指摘，最後仲差啲搞到佢無咗份工！呢班「愛字堆」真正係害國害港，累人累物。

佢哋包括以淨心BB為首嘅「愛護香港力量」、陳廣文為首嘅「愛港之聲」及專門針對法輪功嘅「青年關愛協會」等等。佢哋好多自稱係香港人，係民間自發。但卻相繼被踢爆大部分成員其實都係一啲來自大陸嘅新移民，有啲甚至被影到同建制派議員私會密談。至於佢哋嘅行動作風，就更加唔使講，經常講手兼夾講粗口，屢次喺啲座談會上搗亂，都係以挑機為主，暴民味道十足。佢哋自稱愛國愛港，但呢種愛國真係稱得上係SM愛國囉！

打從中央政策組邵善波上年提過，要製造輿論抗衡反對政府聲音後，「愛字堆」就出現。到底呢堆嘢同政府有咩關係就不得而知。但係可以肯定，「愛字堆」一啲都得唔到香港人嘅喜愛，仲好乞人憎！