政壇：畀領匯跣親蔡堅擬索償
醫務委員會初步偵訊委員會主席蔡堅要坐輪椅巡房？上星期蔡醫生喺黃大仙中心行行吓跣低，跌傷左腳，前日喺浸會醫院做咗手術，左腳最少六個星期唔可以用力，要用拐杖行路。平日咁忙嘅佢都冇得抖，因為有兩個病人入咗醫院，佢只好坐輪椅去巡病房囉，病人見到佢坐喺輪椅都去診症，真係好感動。
蔡醫生話，左腳小腿骨斷咗，腳踭有啲細骨又裂埋，搵咗食物及衞生局局長高永文個老友謝潤鈿醫生同佢做手術，鑲咗十幾粒螺絲喺隻腳度，而物理治療師教緊佢行路，明日就可以出院。不過，佢出院後都冇得休息，出院嗰日又要開會，仲狂數嚟緊有乜嘢會議要開，只係門診睇少啲症。
提起領匯，蔡醫生都無名火起，事關今次佢喺領匯旗下黃大仙中心跌傷，條氣好唔順，大鬧領匯只係識加租，又唔注重地方清潔，搞到佢跣親喎，真係要諗吓點樣向領匯追番筆醫藥費喎。
