政壇：「四大艷星」齊扭棠哥耳仔
「狄娜」（左一）、「周秀娜」（左二）、彭丹（右二）、蒼井空（右一）輪流扭「鄭耀棠」（中）耳仔。
行政會議成員兼工聯會榮譽會長鄭耀棠日前講政改，爆咗句「好似西方普選咁，整啲艷星出嚟，咁係咪我哋想見到嘅呢？」力撐特首選舉一定要篩走艷星，搞到被人圍剿，昔日艷星、甘肅省政協彭丹率先同棠哥劃清界線，尋日有婦女團體更請願，有參加者掛住兩個筲箕「裝胸作勢」，有人則搖身一變扮成日本AV女優「蒼井空」、已故「奇女子」狄娜，甚至模始祖周秀娜等，各人仲輪流扭甩客串做「棠哥」嘅人士耳仔，「艷」遇若此，棠哥濕滯囉！
「狄娜」（左一）、「周秀娜」（左二）、彭丹（右二）、蒼井空（右一）輪流扭「鄭耀棠」（中）耳仔。
不過，請願者嘅橫額上形容愛美神飛彈嘅「bomb」就被寫成「bome」，睇到人一頭霧水，更重要嘅係bomb解作圓碌碌嘅炸彈，冇導彈或飛彈嘅意思喎！婦女參政網絡主席劉家儀認為英文串法唔重要，最緊要係艷星都尚且敬業樂業，但棠哥就趁行會放暑假連日龜縮，唔肯再就「艷星論」表態，連一向為婦女爭取權益嘅黨友陳婉嫻都冇聲出，激到佢哋威脅要向平等機會委員會投訴。有網民就羅列海外艷星參政嘅成功例子將棠哥一軍。
