政壇：林鄭忽然熱舞輕鬆吓

政務司司長林鄭月娥好多時擔任活動嘉賓，通常都係靜靜咁坐喺度，最多拍吓手。不過，尋日佢出席香港青年協會活動時，居然被老外澎湃嘅熱情融化，佢應美國男子無伴奏組合The Exchange成員抱抱鼓勵，一於大解放豁出去，跟隨音樂揈吓手腳，期間仲同老外成員拖手跳舞添，而坐側面嘅賽馬會行政總裁應家柏熱身相當快，一早已經喺台上自high，當正個舞台係自己咁款！雖然林鄭舞步略嫌生硬，但估唔到佢平日咁文靜，原來都識得跳兩嘢。依家政府施政咁艱難，頂硬上嘅林鄭咪當跳番part舞輕鬆吓囉！