政壇：吳得掂是非多 避談波波

民望低殘 講多錯多

吳得掂尋日出席一個青年活動後，再就自己漏報持有一間顧問公司而道歉，話自己無存心隱瞞，表現得戒慎戒懼。近排各大問責官員出現，都難免被追問陳茂波事件嘅睇法，大家問吳得掂點睇陳茂波涉嫌利益衝突件事，佢就話陳局長已發表自己睇法，佢冇嘢補充喎。無論吳得掂係有自知之明，唔敢再評論其他人，定係想同陳劃清界線，佢哋兩個是非局長嘅民望都一直不相伯仲咁鬥低，依家各有利益申報問題纏身，無謂講多錯多喇。

近期，有啲有關佔領中環活動嘅討論開始涉及學校，亦有學校邀請有關佔中嘅人士到學校演講，吳得掂尋日講到明，學校應培訓學生從多角度思考，以建立自己嘅觀點，但局方係唔會贊成學校教學生做違法行為，有關指引亦已發放畀各學校喎。

佢呢番表態，同之前講佔中似有唔同，早前有人批評佢嘅佔中言論含糊，甚至引嚟執法嘅疑慮，依家吳得掂表態謹慎咗，總算知衰。