消防處嘅職責係乜呢？細路仔都識答喇，咪就係防火同救火囉。不過今時唔同往日，消防官僚不務正業，對佢哋嚟講，打壓正義傳媒可能比防火救火更加重要。

唔信？睇吓咪知囉。呢，消防處早前單憑一封無厘頭嘅電郵投訴，勞師動眾派人直闖東方報業中心，而且深入報館核心地帶伺服器房，結果證實投訴子虛烏有，空手而回。其後本報將二十宗消防安全投訴個案轉介消防處，大家估下佢哋點樣處理吖嗱？講都無人信，居然以「欠缺具體地址」為由，拒絕跟進其中十二宗個案，問你服未！

叮佢個鎯鎯，消防處單憑一封真假不明嘅電郵，唔理三七廿一高調踩上報館，但係收到涉及公眾消防安全嘅市民投訴，反而唔嗲唔吊，關人個關，話唔係玩針對都無人信啦。消防官僚以打壓新聞自由為己任，視公眾消防安全如無物，簡直倒行逆施，不如掛正招牌做現代東廠吖，笨！

老實講吖，消防處拒絕跟進投訴，無具體地址係假，無責任心就真。本報記者只花咗一日時間，就按投訴內容發現大量消防危機，包括走火通道或梯間被雜物阻塞、天台被封鎖或有僭建屋、工廈防煙門被鎖死、電線交疊等等，消防官僚一係詐唔知，一係知都唔去查，咁仲唔係失職？

十二宗投訴不獲受理，其餘八宗投訴亦係有處理等如無處理。雖然消防處承認有關投訴涉及緊急車輛通道，具迫切性需作處理，但居然卸晒畀其他部門處理，自己關人個關。正如區議員話齋，緊急車輛通道阻塞會令消防車無法進入災場救火，除非唔出事，否則後果不堪設想，消防處明知有危機都唔即時處理，卸得就卸，互相推波，咁即係搵市民性命較飛啫。

所以話，香港淪為危險之都，隨便一把火都可能搞到死傷枕藉，唔係無理由o架。試諗吓，消防處明知有安全隱患都懶得跟進，平日仲點會主動出擊吖？兩年前土瓜灣唐樓火災釀成四屍五命慘劇，旺角花園街一場四級火再奪去九條寶貴生命，歸根究柢就係消防隱患埋下禍根，消防官僚見到棺材都唔流眼淚，講得好聽叫麻木不仁，講得難聽根本就係草菅人命。

好明顯，消防處處長陳楚鑫等消防高官就係全港消防安全嘅最大隱患，大家不如齊齊寫信去消防處投訴，今次要清楚寫明，投訴地點就係消防處總部大樓，叮！

第一手消息請下載on.cc東方互動iPhone/iPad/Android/Windows Phone Apps