政壇：搞搞政：曾樹和告御狀藏心計
設計圖片及對白
屏山鄉鄉委會主席曾樹和做領隊，聯同三十多名新界原居民、村代表同鄉委會主席上周上京告御狀，話特區政府喺擴建堆填區同將新界土地納入郊野公園等問題上明恰新界人，而好多政策亦對新界人唔公平。同新界有關嘅政策，點解唔係搵新界鄉議局出頭，有鄉紳好氣憤話，呢班人今次上京簡直就係架空鄉議局，令局內好多人都非常不滿。至於佢哋點解要咁做，而且仲要搵埋新界社團聯會會長梁志祥隨團呢？就可能同選舉有關。
設計圖片及對白
據聞喺特區政府實施新界村屋僭建申報計劃時，鄉議局已分為兩派，其一忠於鄉議局取態，支持申報計劃，另一方就係以屯門鄉委會主席何君堯同曾樹和為首，反對申報。雖然事後雙方似係言和，但其實暗地心裏仲有根刺。另一方面，鄉議局向來同建仔唔多咬弦，加上新社聯同建仔站在同一陣線，正所謂「敵人嘅敵人就係朋友」，呢個可能就係新社聯漸漸同曾樹和走埋一齊嘅原因。
另有消息話，鄉議局副主席張學明一直被鄉紳視為建仔嘅人，就算佢退出唔選立法會，仍背負住新社聯榮譽會長嘅職銜。經過一年，佢好不容易先淡化建仔嘅色彩，稍被認同有資格代表鄉議局，點知今次有鄉紳聯同新社聯訪京被指架空鄉議局，又再令佢尷尬，真係唔知幫邊方好，最後又要主席劉皇發出面處理事件。所以有人猜疑，最後被整蠱嗰位唔知係咪張學明呢？
