林智遠

呢排發展局局長「波波」陳茂波被爆利益衝突疑雲，連累佢太太同囝囝以至外家親戚都一身蟻，但佢嘅頭號親信香港華人會計師公會會長Nelson林智遠，尋日就再獲政府委任多一項公職，似乎無受到恩師捲入政治危機影響。

林智遠

Nelson舊年接替波波參選立法會會計界選舉大熱倒灶，輸咗畀泛民主派候選人梁繼昌，政界估計多少同波波喺投票前夕，被揭太太公司經營非法劏房有關，影響到佢喺會計界嘅支持度同形象。不過，Nelson落選後並無一沉不起，繼續活躍於業界同政圈，並先後獲委任為經濟發展委員會轄下嘅專業服務業小組成員，同埋市區重建局非執行董事等重要公職。

政府尋日再公布，委任Nelson同另一位人士出任空運牌照局新成員。空運牌照局究竟係做啲乜？原來係負責審批香港嘅航空公司經營定期航班服務嘅牌照申請，通常都會有一位會計師做成員，因此估計Nelson今次係接替因任期屆滿嘅會計師公會前會長區嘯翔個位。

第一手消息請下載on.cc東方互動iPhone/iPad/Android/Windows Phone Apps