政壇：李國麟榮登教授議員

陳家洛「副變正」惹非議

教授可能係學者夢寐以求嘅銜頭，所以近年傳出唔少博士冒認教授嘅傳聞。喺舊年舉行嘅立法會選舉，作為浸會大學政治及國際關係學系副教授嘅議員陳家洛就一度被質疑自稱教授，惹來社會唔少非議。

據聞今屆公開大學入面只有約三、四名博士成功升呢做教授，所以呢個名銜確係珍貴。Joseph話佢等呢個教授資格差唔多一年。因為佢舊年十月已報名申請，之後要等大學及海外評審委員會批核佢嘅教學工作、研究論文同公職等。等咗頭半年，佢本來以為自己攞唔到，點知大學喺上個月終於通知畀佢呢個資格，當時非常高興。不過，到現時為止，佢只係請過大學同一部門嘅同事飲茶，而仲未得閒慶祝喎。

Joseph話慶祝與否都係小事，但獲得呢個資格總算係大學給予佢嘅一種肯定，做咗教授之後，會對自己要求再高啲，出產啲更高質素嘅論文。至於工作量方面，佢話唔會特別多咗嘅，都係常規工作啫，但做咗立會議員後，工作已忙到好少返大學，大部分時間都係喺立會做研究或會見學生，有時只會教吓啲散堂，所以好在有同事體諒。

雖然話工作量冇特別多，但由副教授升任為教授，佢連暑假都係冇得放嘅。學生同立會放暑假，但佢就要同其他大學同事繼續寫報告，評核學生嘅表現。佢以後亦會爭取多啲時間，同剛入職嘅同事探討寫論文嘅技巧咁話。所以話呢，做教授有做教授嘅應有水準同工作，唔係自認做教授就得o架！