日日有太陽 天天好生活

香港家陣充滿負能量，高官大話連篇，誠信破產，政客各懷鬼胎，興風作浪，搞到烏煙瘴氣，七國咁亂，市民早就忍無可忍。好彩香港仲有正義傳媒，有正義傳媒就有太陽，有太陽就有希望，隨《太陽報》附送嘅全新《好生活》（GoodLife)尋日起隆重登場，為讀者帶來正能量，為香港帶來希望。

唔係太一叮賣花讚花香，加料炮製、內容豐富嘅《好生活》，將環球娛樂新聞話題、豐富副刊消閒資訊、詳盡特刊專題報道集於一身，別具一格，清新悅目。讀者可能會問，點樣至可以得到一份咁精彩嘅《好生活》？好簡單啫，《好生活》每日隨《太陽報》附送，一報在手，雙重享受，點只超值咁簡單。

今時今日，外國娛樂新聞係年輕人嘅至愛，《好生活》每日為讀者搜羅歐、美、日、韓等娛樂新聞焦點，配以革新嘅Tabloid版面，呈現不一樣嘅感覺，就好似外國非常流行嘅娛樂報一樣，務求令讀者耳目一新。呢，例如尋日見報嘅封面故事咁，詳盡報道當日熱門話題美國樂壇天后Beyonce喺加拿大嘅演唱會上「髮生意外」，圖文並茂，繪聲繪影，直頭好似現場直播咁。話說呢位樂壇天后一把長曲髮被台邊一把大型風扇「卡」住，險象環生，但佢依然落力演出，完全冇甩嘴，呢啲咪叫專業精神囉。

仲有吖，為咗令讀者有新鮮感，《好生活》仲推出以彩圖為主嘅「Good Shot」，集合每日來自中日台韓等地嘅精彩新聞圖片，趣味十足o架。至於外娛專題，更加係精心炮製，絕無冷場，除咗尋日大家已欣賞過嘅「曉積文狼人抉擇」之外，跟住落嚟仲有紅星家居、名車、日劇、韓劇、美劇、上位新人介紹，等等等等。一句講晒，外娛熱爆話題盡在《好生活》！

當然喇，話明係好生活，又點只外娛咁簡單吖。針對各種生活話題，我哋嘅編採大軍將會不遺餘力，為讀者搜羅電玩、美容、時裝、旅遊等潮流資訊，可以講係包羅萬有。最值得一提嘅係，《好生活》採取雙封面設計，其中一個封面以「日日有特刊」為主題，對生活資訊作詳盡及深入嘅報道，周一「Sun Money」、周二「世界漫遊」、周三「醫道」、周四「數碼天書」、周五「汽車世界」、周六「置業安居」、周日「歎世界」，日日不同，天天新款。所以話，唔睇《好生活》，又點算得係潮人吖！

總而言之，日日有太陽，日日好生活。太一叮想再次提醒大家，除咗每日必睇嘅《好生活》之外，唔好忘記逢周五隨《太陽報》附送嘅《好報》，一樣咁精彩o架。多謝捧場！