城中鏡：沈祖堯允供清真餐
沈祖堯
早前有個來自北京嘅中文大學穆斯林學生寫咗封信畀校長沈祖堯，希望中大校園供應清真食物。沈祖堯尋日喺網誌話，其實大學之前已有呢個構思，但因涉及多項考慮因素，所以至今未能成事。但佢就拍心口話，為咗令中大社群學習尊重文化差異，承諾會喺十二個月內實現呢個構想。
沈祖堯
沈校長又話香港以包容差異、尊重不同而著稱，無論你係天主教徒、基督教徒、佛教徒、回教徒定係印度教徒，都能以各自嘅方式敬拜神；無論喺政治立場上，你信奉資本主義、共產主義、社會主義諸如此類，都可直抒己見，大學係社會嘅縮影，更應該學習兼容並蓄。
