政壇：搞搞政：「中年無樓係廢人」 侯志強被插爆
設計圖片
基層市民上樓難，年輕人置業更加困難。但向來語出驚人嘅上水鄉事委員會主席侯志強尋日出席立法會發展事務委員會特別會議時，就認定有樓在手先叫正常人，仲話如果人到中年四、五十歲仲未有物業，就叫做廢人。
設計圖片
此話一出，即刻觸動到唔少泛民議員神經，議員陳偉業覺得侯志強出言冒犯議員，梗係要道歉啦！另一議員涂謹申亦鬧佢貶低無樓人士，侯志強就話自己嘅言論係鼓勵年輕人發憤圖強喎！最後工黨副主席張超雄出招，話自己既係五十歲以上，亦冇物業在手，質疑侯志強擺明冒犯佢，所以要委員會主席謝偉銓即時裁決，謝偉銓惟有提出休會五分鐘同法律顧問研究。點知呢個時候侯志強仲寸嘴話：「你告我囉，我講咗就唔會收番！」又話如果議員鍾意辯論，第日佢做咗立法會議員後大把機會，叫其他議員唔使心急。但最後謝偉銓都放生侯志強，無趕走佢亦無叫佢收回，只係叫大家發言時留意用語。
唔少網民聽到侯志強「廢人論」後都插爆佢，話呢啲說話只係連祠堂都可以賣嘅二世祖先講得出，根本唔係「人話」喎！亦有好多網民批評侯志強身為原居民，就算唔係含住金鎖匙出世，都含住塊地出世，寸爆佢根本唔使做嘢就有樓收租，當然可以講風涼話啦！亦有網民建議，如果佢真係咁叻，應該叫啲仔女主動放棄丁權，睇下班仔女係咪廢人喎！
