政壇：龐愛蘭為貓屎咖啡平反
周伯展（右起）、龐愛蘭、麥Sir同黃冠樺齊齊推廣野生麝貓咖啡。
身價不菲、風味獨特嘅野生麝貓（貓屎）咖啡，風靡萬千咖啡迷，但有環保團體指出，採集呢種咖啡豆過程好唔人道。近期愛上貓屎咖啡嘅沙田區議員Scarlett龐愛蘭，日前就聯同咖啡達人黃冠樺（咖啡黃）為此大平反，話野生貓屎咖啡絕對環保，仲係廢物利用添，唔人道嘅只係人工養殖嘅麝貓喎！
周伯展（右起）、龐愛蘭、麥Sir同黃冠樺齊齊推廣野生麝貓咖啡。
Scarlett話從來對咖啡冇特別興趣，直至遇上咖啡黃，畀佢品嘗第一口野生貓屎咖啡後，即甘之如飴。當日佢拉埋醫學會副會長周伯展齊齊品嘗野生貓屎咖啡，咖啡黃就搵來佢嘅得意門生麥Sir親自研磨同沖製咖啡，仲善用唔同產地咖啡嘅特性，炮製出一系列以咖啡入饌嘅佳餚。
咖啡黃自年前發現患癌，一直樂觀面對人生，無間斷推廣咖啡文化。今年初佢出版一本有關咖啡嘅書籍，並將賣書收益捐畀亞洲癌症研究基金會。下月於會展舉行嘅美食展，咖啡黃同麥Sir會示範即場炒咖啡豆，Scarlett話到時會炒埋一份喎！
