政壇：行會申報有殺錯冇放過
設計圖片及對白
行政會議成員Bernard陳智思尋日接受白鴿黨劉慧卿網上電視台嘅訪問，大談今屆政府對行政會議成員嘅品格要求有幾嚴謹，就連品格審查都要做埋，真係較前朝政府着緊好多，似乎係「有殺錯冇放過」咁喎。Bernard話好彩佢大部分親戚都喺外國，冇乜涉及香港生意，否則都唔知點搵資料畀政府。既然政府審查得咁嚴，點解仲不時傳出官員漏報醜聞呢？
設計圖片及對白
唔知波波有冇申報
其實就發展局局長「波波」陳茂波今次涉嫌喺新界東北發展計劃有利益衝突嘅事件，另一行會成員葉劉淑儀曾經話波波開會時冇申報，係咪有啲咁嘅事呢？Bernard就話真係唔知波波有冇申報，因為當佢哋傾到呢個議題時，史無前例咁多成員要申報利益，有啲人更加要避席，佢又冇寫低啲成員個名，所以實質有幾多人要申報真係數唔清喎！
Bernard以自己為例，當行會傾到呢個議題時，連佢因為有間公司做物業投資都要申報，秘書處亦因此提醒佢，話呢間公司唔係完全冇機會收受到利益喎！
但Bernard話秘書處所知道嘅，只係有關行會成員公司嘅工作性質，到底佢哋嘅公司仲有冇從事其他嘅業務，始終都要靠成員自律，作最後把關。
講番今屆政府有幾着緊行會成員嘅利益申報及品格審查，佢話特首每次傾到一個新議題時，都先要班成員作利益申報，問清楚大家同有關議題有咩特別關係，同時喺討論中途，秘書處又會再確認大家係咪全部將利益申報妥當。
至於品格審查方面，佢就話上屆政府只係官員需要做，行會成員都唔使審查嘅。但今屆政府就連行會成員嘅直系親屬都審查埋，以佢為例，當局作審查時就連佢班兄弟姊妹讀邊間大學，喺邊度畢業都要問埋，佢即時口啞啞，「點樣搵畀你呀？」所以話特首係「有殺錯冇放過」原來係真嘅。
