前立法會大樓門前嘅正義女神手執利劍，蒙着眼睛，象徵司法制度公平公正，法律面前人人平等。不過咯喎，今日香港不公不義，司法利劍往往只係向小市民開刀，女神蒙着雙眼，就好似對權貴隻眼開隻眼閉，所謂人人平等純屬大隻講。再咁落去，香港法治招牌遲早同女神像一樣，變成供人緬懷嘅歷史遺物！

點樣至可以改變呢種亂象呢？惟有寄望包青天再世囉。嗱，現任律政司刑事檢控專員薛偉成將於今年十一月退休，有傳接替佢嘅係資深大律師楊家雄，預料最快九月履新。大家估吓香港會唔會出現青天大老爺吖嗱？睇怕都幾難咯。

無論點都好啦，新人事，新作風，遲到總好過冇到。法律界人士係咁講嘅，楊家雄專長於商業法，由佢接掌刑事檢控工作，相信有助清理積壓多時嘅案件，特別係貪污及詐騙案，例如前特首曾蔭權爵士涉貪案同前廉政專員湯顯明涉不當酬酢案咁。嗱嗱嗱，關鍵就喺呢度，如果新官一上任就手執正義之劍，左一劍法辦貪曾，右一劍制裁貪湯，再嚟一劍嚴懲貪曾貪湯嘅貪腐共犯，咁就大快人心，全港市民拍爛手掌啦。望就係咁望，但事實係點，只能拭目以待嘅咋。

講到貪曾案，簡直係香港嘅恥辱。正如前刑事檢控專員江樂士話齋，案件拖咗十幾個月依然石沉大海，無交代，無進展，無結果，更加無提出檢控，簡直「不可思議」。聽到未呀，經過貪曾七年之禍，香港廉政及法治已經搖搖欲墜，再唔撥亂反正，遲早玩完吖！

講開又講，現屆政府上場短短一年，醜聞不斷，風雨飄搖，管治一團糟，淨係發展局局長陳茂波一個人就醜聞不斷，一時捲入劏房風波，一時涉及醉駕，一時又被指囤積農地，都唔知點收科。弱勢政府百事哀，如果執法部門繼續包庇貪官，香港法治毀於一旦，呢個政府睇怕都維持唔到落去咯。有人話，嚴懲貪官，維護法治，係港府自我救贖嘅機會，真係一啲都冇講錯。

咁講啦，刑事檢控專員換人係一個機會，起碼貪曾案一拖再拖、石沉大海嘅僵局有望打破吖嘛。不過咁，如果新人同舊人一樣，又係蒙住雙眼，隻眼開隻眼閉，即係換湯不換藥，盞嘥氣嘅咋，叮！

第一手消息請下載on.cc東方互動iPhone/iPad/Android/Windows Phone Apps