SUN搞作：打橫嚟講：When we were小學雞的水平
幾十年前，自己仲係個小學雞思維水平嘅小學雞的時候，最愛玩啲懶有嘢嘅語言藝術IQ題玩意，例如：「我老友個老友，你知唔知係邊個吖？」「哈哈！你咁都估唔到？乜咁鈍o架！」「哈哈！佢你都識個喎！」「包你識……」
「我老友個老友，咪即係我囉！懵丙！哈哈！」滿心歡喜地叻爆！
上述是個超低班的語言邏輯技巧，只要懂得「倒裝思考」便是！我的老朋友，等同我也是他的老朋友，咁！他的老朋友，咪係我囉！
我的股份轉讓咗畀「我親戚嘅親戚」，那麼，嗰啲股份轉讓咗去邊呢？
人家一早開誠布公啦！只不過，今次，佢真係講大話囉！因為，呢劑唔係「親戚」，而係「親人」。
另外，亦有問責官員聲大大咁喺立法會內回應議員質疑攞老婆做擋箭牌，畀人任射時，還拖話：「你係咪可以將你太太所有屋企人（包括太太個仔？）嘅其他嘢都全部掌握同全部公布？」嘩吓！若咁嘅邏輯都得，唐唐因大宅僭建泳池，畀政府窮追猛砌，咪真係死得好唔抵？因唐唐也會有可能未曾全部掌握到佢太太嘅嘢個喎！佢太老實，不懂以此偽語答辯。
最後，一波未平，一波更「杰」的波波就有關囤地醜聞，聲言話舊年九月已「主動」向香港廢柴政府嘅特首申報咗相關利益，呵呵……即處理咗就等於處理好。
本屆特首咁講：「個僭建處理咗，個僭建就唔存在。」呢啲正正係幾十年前，When we were young嘅語言藝術遊戲囉！仲玩？乜咁曳o架？
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
