SUN搞作：Sun官場現形記：雀屎劣迹回顧
實況轉播
貪曾雀屎落咗台，成日不請自去唔同嘅典禮，務求拎着數，最近佢就出席中山市一個論壇，不過佢頭耷耷眼濕濕，似乎無人識佢！好彩佢遇到李衞，知道佢啲貪腐劣迹，同佢傾咗幾句。
實況轉播
貪曾：（大言不慚）交友三道，所謂：「友直、友諒、友多聞。」我一直都好固執，唔係好嘅朋友，我係唔會結交㗎！
記者：可唔可以畀啲例子呀？
貪曾：（發表偉論）以友直為例，朋友貴乎率直，會指出你嘅問題，並引導你去正確嘅位置。
記者：乜你嘅朋友無提點你唔好「貪飲貪食」咩？你依家仲不斷巴結內地權貴，係咪想佢地引導你去「政協」嘅位置呀？
貪曾：（心虛手震）你聽我講埋先，好似友諒咁，好朋友係會體諒你嘅錯處，唔會放棄你。
記者：喺論壇上面，你啲高官朋友唔願理你喎。仲有，你出賣香港市民，「起錨」政改搞到一篤屎，你仲想人體諒，有無廉恥？
貪曾：（淆底想走）我……至於友多聞，朋友見多識廣，跟住佢哋，自然會擴闊眼界。
記者：肯認喇咩？你成日過大海、北上同富豪權貴「好朋友」飲飲食食，個胃一定闊咗好多，唔怪得要貪咁多鮑魚、肥雞、菜心啦！
