政壇：政總天橋遇雷暴變瀑布
新政府總部趕工入伙，事實證明手尾多多。好似由金鐘港鐵站海富中心外前往立法會及政府總部嗰條有蓋天橋咁，漏水已經唔係新聞，但尋日天文台發出雷暴警告訊號，黃昏時一場大雨，就搞到天橋好似瀑布咁，立法會議員梁志祥及社民連梁國雄助理都分別喺社交網站上載咗照片，話估唔到喺天橋內都要擔遮喎！
瀑布應該去山邊或郊區先可以睇到o架，依家市區都見到，就真係好離譜！講番呢條有蓋天橋，本來設計係為市民遮風擋雨，點知工程欠妥，搞到家吓小雨漏水、大雨變瀑布。建制派同泛民喺政經大事上大都撐到行，但今次關注天橋質素就意見一致，睇嚟政府呢個豆腐渣工程仲有團結社會嘅效能。
