政壇：粉嶺高球場會籍價企硬
當局欲推新界東北發展計劃，但當區居民要求當局先收回粉嶺高爾夫球場用地，政府亦表明只要一年通知期就可以收番笪地，搞到多名富豪接連發功要求保留粉嶺高球場。政治氣候雖然不穩，但據聞粉嶺高球場會籍價格依然鐵價不二，有人為咗子女可享會籍，更早早排定隊添！
擁有粉嶺高球場會籍嘅商界中人爆料，佢早於八十年代末購入高球場會籍，當年入會要一萬元，當年嘅一萬元唔係細數目，甚有身份象徵嘅意味。事隔二十多年，綜合各方消息話，高球場嘅個人會籍仍要十多萬元，同二十多年前一萬元相比升價十倍，至於公司會籍價錢就認真「海鮮價」，據聞最高峰時期有某大財團以一千三百多萬元購入，依家都仲要成五至六百萬元，價錢仍然企得好硬。
據聞高球會仲向欲入會嘅富豪講明，政府有權收回高球場土地，但啲富豪依然入會，信心未變。據聞有商界人士仲未雨綢繆，為下一代子女排定隊入會，有人笑言以前輪會籍要十幾年時間，或者下一代要輪二十幾年都唔出奇。
有商界人士仲話，如果港府敵不過強大民意要收回粉嶺高球場，佢哋都要上街表達不滿。
