政壇：「收北京錢」風波 卿姐人力互插
劉慧卿不點名指摘人力收北京錢狙擊該黨。
民主黨（白鴿黨）立法會議員劉慧卿日前接受電視訪問時，不點名批評人民力量（人力）喺早前選舉中狙擊白鴿黨，係因為「收北京錢」，又稱不少來自北京嘅中央官員已證實呢個說法，又對人力可能退出真普選聯盟表示「悉隨尊便」。
劉慧卿不點名指摘人力收北京錢狙擊該黨。
卿姐尋日接受查詢時重申，指自己批評人力「已經唔係第一日嘅事」，又指人力承認去年立法會選舉期間，收受新界社團聯會名譽會長杜玉鳳巨額捐款，足以證明人力「收北京錢」。對於再度公開抨擊對方會否影響雙方喺真普聯嘅關係，卿姐回應話：「我一早表明同佢哋割席，我哋邊有關係？我已經講咗成年，咁有咩辦法？其他人鍾意佢哋係佢嘅事，我點樣遮住自己良心？」
人力尋晚發聲明，強烈譴責卿姐嘅言論，指人力願意放下身段，同喺上次政改出賣選民嘅白鴿黨喺真普聯合作，但白鴿黨如今竟破壞雙方合作關係，抹黑同排斥少數派意見，目的只為下次政改讓步製造下台階。人力將去信白鴿黨及真普聯召集人鄭宇碩要求解釋，否則將即時退出真普聯。
