政壇：峰爺做代主席好騰雞
設計圖片及對白
做新丁議員啱啱一年，金融服務界張華峰（峰爺）就遇到大挑戰！立法會《二○一三年證券及期貨（修訂）條例草案》委員會尋日舉行首次會議，並選舉主席，本來建制派早已協商陳鑑林（橄欖）做主席，但橄欖有事離港缺席會議，最後搵咗獲選副主席嘅峰爺主持會議。但峰爺舊年先入場，今次忽然做代主席，仲要即時開始主持會議，搞到佢不知所措，緊張兼騰雞，期間更試圖搵泛民主派議員代佢主持會議添，過程認真搞笑。
設計圖片及對白
唔記得熄咪
據聞峰爺一知自己將要主持會議，就想搵委員涂謹申幫佢做代主席主持會議，但阿涂就話佢應該同在場議員商討，再搵合適人選。此計不通，峰爺惟有鼓起勇氣，行去坐上主席位。但唔知係咪冇關閉收音系統，佢同秘書之間嘅對話多咗唔少聽眾，峰爺同秘書講咗幾句，唔知係咪話畀秘書知自己唔識開會程序，隱約聽到秘書話：「得喇，我會協助你o架喇！」然後就見峰爺鬆一口氣、向在座委員話自己第一次主持會議，請大家多多支持喎！
會議開到尾段，大家討論下次會議時間時，峰爺又需要其他議員贈番兩句。但尋日會議中，兒戲嘢仲要返到委員會選舉正、副主席，雖然建制派已協商橄欖做主席，而橄欖開唔到會亦唔緊要，但申報利益方面就出事喇！話說進出口界議員黃定光（象哥）代表橄欖申報利益，話橄欖有個唔受薪嘅證監會非執行董事身份，但原來個非執董係受薪嘅，象哥經委員提醒後，先更正話橄欖每年收取三十萬元薪津喎！點都好，建制派人多始終着數啲，橄欖最後以一票之微成功當選委員會主席。
