扶貧浮萍分唔清 濫竽充數現原形

一、課堂語言運用部分，有為人師表者衝口而出「很好喎」、「很棒耶」等粵語同台式詞彙，甚至中英夾雜。咁樣嘅普通話，相信普通人未必識聽囉。

二、聽辨詞語試卷，有考生大筆一揮，將「扶貧」寫成「浮萍」，更寫上「坦特不安」同「水管理」。究竟「坦特不安」係點嘅心理狀況？「水管理」又係乜東東？大家（抓）穿頭皮都諗唔到。原來，正確答案係「忐忑不安」同「水管裏」。

三、喺英文寫作卷，有人混淆單眾數，有人句子結構出錯，有人連教英文最基本嘅auxiliary（副詞）、preposition（介詞）及modal（語氣詞）都串錯；課堂語言運用部分，有老師不斷重複「understand？（明白嗎？）」、「OK？」等簡單提問。堂堂英文教師嘅英文水平居然係有限公司，太一叮就唔understand咯。

而最令人難以understand嘅係，上述情形唔係個別例子，而係反映教師同準教師嘅整體水平。評核報告指出，今年分別有一千七百三十九人及二千二百二十六人參加英文及普通話基準試，當中英文聆聽卷合格率繼續插水，寫作卷更有五成半考生肥佬；普通話方面，拼音卷合格率亦只得五成九咋！正所謂，名師出高徒，劣師出笑話，眼見大批肥佬教師湧現，家長就真係「坦特不安」咯，叮！

最好笑嘅係，面對呢張滿江紅嘅成績單，為人師表者諸多辯駁，鼓動「三寸必賴之舌」，一賴考生應試技巧唔熟練，二賴太多非語文科教師應試拉低整體成績，有人甚至建議當局取消基準試，畀教師「專心教學」喎。

即係咁，中央駐港官員最近咪用「篩子」比喻特首選舉，引起全城激辯嘅。計太一叮話齋，十年樹木，百年樹人，最需要去蕪存菁嘅係老師，基準試呢個篩用咗咁多年，來來去去都係篩出大量「稗子」，明顯反映種子良莠不齊。為免濫竽充數誤人子弟，當局應該加強師資培訓，對症下藥提升教育水平。

講到底，不教而戰謂之棄，不學而教謂之害，唔合格嘅老師，冇可能教出合格嘅學生。對教育當局來講，當務之急就係提升教師質素，否則，年年測試除咗打擊佢哋所餘無幾嘅自信，仲有乜嘢意義？叮！