今屆，連續七天的書展，在碎雨陰霾間斷下，昨日收檔了！

往年，香港特首如何公務繁忙，也會抽空現身書展，表面是親民，和支持這個號稱全球最多人次入場的文化活動，實則，是一個政治騷，吸取政治分數；然而，那些芝麻官仔或議員們也明白這簡單道理，每每趁此時刻，高調地通知傳媒，爭取曝光，有助官運之餘，也提升個人文化身份地位，市民亦樂見「偶像」近距離接觸，這便是「政治」囉！可惜，今年，整整七天，全個香港特區政府團隊，由特首、司長，以至問責官員一件都沒蒲頭，是忙得要命，撲火、補鑊救波波吖？或是怕見市民呢？

半官方機構身份的主辦單位貿發局的回應，說民政局曾德成有出席「開幕酒會」喎！哈哈！算罷啦！廢柴政府下之廢柴機構……

講到貿發局之廢，真要命，呢個最出名係「好大喜功」的機構，成日要求要擴建展館，但卻一直沒法管理得宜；依家「地方細細」，人流入場有限，但館外附近馬路（博覽道）則由朝塞到晚，平常兩分鐘的車程，可以停頓四十五分鐘不動，呢啲就係叫做管理？尤其是每次出咗問題，貿發局就推卸話係灣仔警方處理的！好呀！馬路是警方的事，場內的電訊網絡幾近全部癱瘓，不特止手機打出打入不得，連電子收費功能也廢晒，不少參展商損失慘重，貿發局又話唔關你事？連咁嘅基礎設施都做唔掂，擴乜春建呀？成班廢柴庸材！

各位香港市民，大家請關注住，如果香港廢柴政府話批准貿發局擴建灣仔會展中心，我哋就要睇吓中間有乜景轟，發展局陳茂波有無份參與啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps