SUN搞作：少膽虫手記：畀人摑兩次
少膽虫絞盡腦汁思考聽日見報作咩新聞好嗰陣，淫黎突然奮力一抽虫仔嘅衣領，「的」咗少膽虫入房。「腦細，你今日咁風騷嘅？係咪喺我身上聞到同娜姐一樣嘅騷味？」
淫黎聞之，一巴摑落少膽虫塊面度。「我想讚你尋日篇稿有熱誠咋！唔通讚你靚仔咩？」虫仔愈嚟愈跟唔到，「東北唔發展，粉嶺留返嚟打Golf，咁就最好喇！你地通通畀big brother呃咗喇……香港大把地用！」全霉腦細向來誨淫誨盜，今次竟然認真？唔通係「身邊人」虫仔改變咗佢？少膽虫不禁莞爾，「黎黎，你終於似番個人喇！」，「地者若水，自然之本也。買定撻地，留番嚟野餐唔好咩？」諗到同淫黎喺草原上面蕩漾，少膽虫心動鳥。
「賤虫！」淫黎再一巴摑落少膽虫塊面度，「依家買咗，十年後喺上面起十座全霉大樓，到時我仲唔叱吒風雲？」，「腦細，改變土地用途，畀人告o架喎！」
淫黎嘴角上揚，攬住少膽虫，喺條虫耳邊道：「畀人告？我咪推我個內子出嚟囉……」，淫黎竟然連女人都利用？「即係你呀，內子！」
