政壇：發叔多地話漏報唔出奇
發展局局長陳茂波被揭發其妻家族喺古洞有農地，涉嫌利益衝突，佢連日來喺香港同天津，解釋完一次又一次。政界再次沸沸揚揚，討論問責局長同行政會議成員嘅利益申報係咪有問題。喺呢個時候，已唔係行會成員嘅立法會發展事務委員會主席劉皇發又被質疑漏報咗塱原有塊地，發叔尋日解畫話漏報唔出奇喎！
發叔話，佢已經向立法會申報咗利益，只係「漏報都唔奇」，原因係佢有好多地。不過，發叔指，佢會盡量做到申報利益具高透明度，又話只有唔做發展事務委員會主席，先至唔會有利益衝突喎！捲入漏報疑雲都咁滋油淡定，發叔果然係熱廚房裏面日子耐，大風大浪見得多。不過，正因為佢擁有嘅地多，申報更應該小心過人至係，發叔喺政圈咁耐，好應該明白，無論原因係乜嘢，漏報同唔報嘅結果係一樣嘅，就係有機會被追究囉。
