政壇：白鴿老化整色整水難救
白鴿黨近年不斷積弱，立法會議員數目由高峰期嘅十幾人，減至依家只有六人，已喪失泛民最大政黨嘅地位，區議員數目亦由最多嘅近百人，減至依家只有四十幾人，主因之一係該黨形象日漸老化，立場又唔夠其他泛民黨派咁鮮明，得唔到八、九十後青年人嘅支持。由一批乳鴿黨員組成嘅民主黨「創意媒體部」，最近就取得黨內嘅老鴿支持改形象救亡，其中一個重點就係改變該黨沿用二十多年嘅青綠色。
呢批乳鴿認為，白鴿黨用開嘅青綠色聽落就好似好年輕、好清新，用喺宣傳設計時就畀人覺得「青BB」，又「娘」又難用，於是就揀過一隻佢哋覺得型啲嘅墨綠色，供議員黨員印卡片同設計街板橫額之用，但由於正式更改黨徽同黨色涉及修改黨章，暫時唔會搞住。不過，白鴿黨近年已經愈搞愈沉，依家仲換過一隻沉啲色，驚唔驚崩口人忌崩口碗呀？
除咗整色整水，「創意媒體部」最近又斥資近十萬元買入大批攝影器材，學其他新進泛民咁大玩自拍上網，其中白鴿黨主席劉慧卿已答應拍片教烹飪，睇吓最後又會唔會煮到一鑊粥鬧出笑話？
