消費者委員會上周一出版嘅《選擇》月刊以蜂蜜測試作賣點，由於蜜糖係老少咸宜嘅健康食品，又潤喉又可增強身體免疫力，一直都好受歡迎，因此介紹蜜糖嘅《選擇》月刊，二萬三千多本喺推出不足一個星期已賣斷巿，有巿民特登去書展搶購，又致電消委會要求訂閱。為免消費者失望，消委會決定加印三千本，巿民聽日就會喺市面見到嘞。

《選擇》月刊賣斷市唔係第一次，過往有一期介紹強積金，亦吸引全港打工仔搶購，結果亦要加印。《選擇》月刊今期測試咗五十五款蜜糖，包括較昂貴嘅麥蘆卡蜜糖，消委會話，結果驗出當中有部分含抗生素或摻雜糖分，唔少巿民都想知道邊隻蜂蜜有問題，自己買咗蜜糖有無「中招」，亦想解構幾百蚊一樽嘅貴價蜂蜜喺咪貴得有道理，所以今期《選擇》一出就搶購一空。單是書展期間已有唔少巿民四圍撲《選擇》，並要求訂閱，消委會於是決定加印三千本。消委會又報喜話，單是書展已接獲逾千訂戶訂購未來一至兩年嘅《選擇》。

第一手消息請下載on.cc東方互動iPhone/iPad/Android/Windows Phone Apps