政壇：馮檢基搞「垃圾聯盟」搶人氣
阿基（左）與哪吒之前已經就環保議題有合作。（資料圖片）
立法會議員馮檢基尋日聯同西貢區區議員方國珊（哪吒）及南區區議員司馬文，齊齊出動摷垃圾，呼籲市民做好垃圾分類。佢哋話喺垃圾問題上志同道合，以後有關政策都會一齊探討，三個來自唔同地區，政治背景又唔同，無端端走埋一齊，真係令人摸不着頭腦。有傳阿基想借助哪吒嘅人氣打入新界東選區，究竟呢個「垃圾聯盟」有乜景轟呢？
阿基（左）與哪吒之前已經就環保議題有合作。（資料圖片）
馮檢基（右一）、方國珊（左一）及司馬文（右二）齊齊摷垃圾搞分類。
佢哋尋日好整以暇咁戴起醫療手套，喺垃圾桶攞垃圾出嚟分類時，唔夠五分鐘就天降大雨，搞到佢哋都要移師天橋底進行，而阿基就喺分類垃圾期間，不時望實傳媒嘅鏡頭，真係識搶鏡。講到「垃圾聯盟」嘅由來，阿基話，喺立法會選舉時已認識司馬文，而且對方亦曾幫佢選舉抬轎。至於哪吒就因為搞將軍澳堆填區問題時，大家傾開又覺得志同道合，所以今後會一齊探討環保議題喎。
