政壇：中史必修 唔得掂腳震
設計圖片及對白
今屆政府舊年啱啱登場，就因為德育及國民教育科一事搞出軒然大波，成個暑假都忙於拆彈。事隔一年，有「梁粉」就因應教育界對於中史科愈來愈少人修嘅現象醞釀反擊，擬向教育局倡議將中史科列為必修科之餘，仲有意建議由小學開始就要有中史科。雖然佢哋講嘅係中史，但國教風波在前，事件發展可能仲有萬千變化……上任後被揶揄為「唔得掂」嘅教育局局長吳克儉，如果無對中史科應否做必修科有個好啲嘅說法，睇怕定必畀人「追瘦」喇，睇嚟，必修中史勢成另一個燙手山芋。
設計圖片及對白
建制派近年搞好多內地團，得到嘅訊息係要保持香港繁榮穩定嘅動力，希望香港青少年做個愛國愛港嘅薪火傳人。言猶在耳，原來有親中人士正密密做工夫。有親中消息指，建制派未有因德育及國民教育科獨立成科一事泡湯「被打沉」，其中有「梁粉」更醞釀反擊，向教育局倡議將中史科列為必修科。
建制反擊戰主動出擊
眾所周知，吳克儉曾經形容中史科喺中學文憑試最受歡迎科目中排第八，形容仍然屬於受歡迎嘅科目，有人自言建制呢場反擊戰要到位，首要係強力游說吳克儉為中史科成為必修科「開綠燈」，否則一切都只係停留喺吹水階段。
另一方面，針對泛民主派積極走入大學、高中初中等同年輕一輩接觸，大為落後嘅建制派開始急起直追，據聞有親中人士密切留意網上討論焦點，更會主動向學校敲門睇下有無同學生交流嘅機會。不過其實講乜都假，如果建制派停留喺說教嘅階段，又無好似泛民主派中人，甚至係學民思潮黃之鋒等能言善辯之人，要慢慢向青少年潛移默化國情，呢個認真係天方夜譚！
