食環署翻閹高官 納稅人被搵老襯
如果閣下以為當今「超級筍工」仲係去澳洲大堡礁做保育員，每日享受陽光海灘，每月十幾萬港幣落袋，咁就Out咗喇。嗱，超級筍工遠在天邊，近在眼前，本港食環署就有喇，年薪過百萬，返工唔使蒲頭，搵工更加唔使爭崩頭，條件只有一個，就係退休高官。
本報踢爆食環署高薪「翻閹」廿六名退休公務員，其中前助理署長勞月儀退休唔夠兩年，就獲聘出任小販資助計劃小組統籌主管。咪睇個銜頭水蛇春咁長，查實冇乜嘢做嘅咋，記者喺呢位所謂主管嘅辦事處外等咗三日，連佢個影都見唔到，致電辦公室又冇人聽。有職員話喎，試過成個禮拜都冇見過佢返辦公室。
開工神龍見首不見尾，但報酬一啲都唔差。兩年合約，月薪近十萬元，加上約滿酬金，總共超過二百五十萬，而且每個月四萬幾長俸繼續袋袋平安，雙重福利，你話係咪超級筍工吖。最離譜嘅係，咁筍嘅工，居然冇經過公開招聘程序，如果話冇景轟，細路仔都唔信喇。難怪有立法會議員質疑事件涉及「私相授受益熟人」，有利益輸送之嫌，擔心食環署淪為退休高官俱樂部。
其實，食環署早已變咗退休高官俱樂部喇。署方近年以高薪聘請咗廿六名退休公務員，其中好多人都冇經過公開招聘，包括以時薪二百五十蚊聘請退休衞生督察職系人員擔任兼職助理，手板眼見工夫，月薪卻有二萬幾，同樣係筍工。
時薪二百五十大元，等於法定最低工資八倍有多，究竟做啲乜吖？真係講都冇人信，原來呢班超高薪兼職助理每日只係負責包裝同運送樣辦，擺明益自己友，搵納稅人老襯啫！
冇計喇，正所謂，上樑不正下樑歪，食環署都係有樣學樣啫。港府翻閹廢官上咗癮，唔理好醜，但求就手，乜垃圾都啱。呢，好似食環署舊老細、有「一周一鑊」之稱嘅前食衞局局長周一嶽咁，做問責局長時渾渾噩噩，累人累物，搞到民怨沸騰。點知政府換屆，呢塊舊電池居然冇畀人揼去堆填區，反而鹹魚翻生，出掌平機會。有人話政府已經變成廢物回收站，真係一啲都冇講錯。
計太一叮話齋，今屆政府管治班子拉雜成軍，濫竽充數，施政九唔搭八，民望低沉，家陣仲要飢不擇食，一味翻閹廢官，正一阿蘭嫁阿瑞，大家累鬥累，咁搞法，遲早一齊玩完嘅咋，叮！
