SUN搞作：打橫嚟講：「四民社會」之讀書人
傳統中國，本是個「四民社會」！
何謂「四民社會」呢？乃指中國本由四大類人民合組而成的，分別係士、農、工、商，亦即係話此四大職別人等，是建構成一個國家的主要棟樑。
「四民社會」裏的「士農工商」，以「士」排首位，可見古時中國人對「士」何等尊重！
「士」者，讀書人也！現今詞解，譯作「知識分子」也！
以前，惟有讀書高的年代，書生寒窗苦讀，赴京考試，就是為了加入國家權力中心之管治團隊，跟君王共治天下。縱使，名落孫山，未能謀得一官半職，亦可回鄉開私塾學苑，栽培後進，訓育英才，也算造福社會，為國獻力；再唔係，自身飽讀詩書，自省修德，不行邪道，光明磊落，好人一個，實屬世道之福吖！
可是，當今中國，「四民社會」只重商，輕士農工，一味講錢講利益。打工仔除了被剝削外，再無生存價值，亦無向上流的機會。農民就更慘，祖屋家田不是被強徵豪奪，就係泥土污染，種出的收成，全部含毒量高，工作既辛勞也不獲尊重。「士」？講都唔好講了！中國再無「知識分子」，只有成名的「作家」。在意識形態被政權牢牢捏緊的地域，何來思想自由？沒思想的地方，何來獨立的精神？言論被箝制得隨時會家破人亡時，仲講乜叉創見吖？還是聽話聽教，寫啲大家開心、阿公放心的創作咪好囉！「一紙風行」比「一言九鼎」實際呀！
知識分子？哈哈！留番寫古裝故事時追憶吓吧！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
