設計圖片及對白

熱論過一輪嘅立法會地方選區劃界問題最近忽然間靜晒，據聞係同考慮中嘅方案影響到建制派最大政黨建仔利益有關。最近建仔有人諗縮數提出一個新方案，一方面可以解決新界西人口過多嘅問題，另一方面又唔會令民記現有議席減少，就係將現時屬於新西嘅葵青區撥歸九龍西。不過，呢個方案會將建仔現任新西議員Ben陳恒鑌嘅票倉一分為二，令人質疑建仔內部有人想逼走阿Ben。

設計圖片及對白

票倉割開 兩面不是人

最近建仔有人提議將葵青撥歸九西，令新西議席減至七席，建仔應可取得兩席，至於人口本已持續增加嘅九西，加埋葵青之後可能會增至八席，建仔元秋蔣麗芸名單只要攞到約七萬票，就已經夠贏兩席，合計幫建仔保住新西加九西現有嘅四席，點計都唔會蝕章。

但有區內人士分析，葵青撥九西方案的確對建仔最有利，但係就威脅到同屬建制派嘅工聯會麥美娟、新民黨田北辰同西九新動力梁美芬。阿Ben喺上次選舉主要靠荃灣同葵青區食胡，該方案變相將佢嘅票倉割開，令佢留守新西就未必夠票贏，轉戰九西又要同該區嘅第二梯隊爭，兩面不是人。我哋就該方案問過阿Ben回應，佢強調荃灣葵青本屬同一區，在多方面都關係密切，分開納入兩個立會選區，可能影響到對居民嘅服務，明顯有好大保留囉！

第一手消息請下載on.cc東方互動iPhone/iPad/Android/Windows Phone Apps