政壇：吳秋北唱反調倒米
設計圖片及對白
工聯會嘅中醫服務愈嚟愈具規模，診所有十間之多，尋日再有一部新流動中醫服務小巴落地之後，佢哋嘅三部中醫流動服務小巴可將服務遍布香港、九龍同新界。而喺尋日嘅啟動禮，工聯會搵咗佢哋嘅領導同立法會議員嚟撐場，當然個個都硬銷佢哋嘅中醫服務有幾掂啦，但係佢哋嘅理事長「吳揪得」吳秋北，竟然就唱反調喎！
設計圖片及對白
佢哋嘅立法會新界西議員Alice麥美娟話中醫可用嚟調理。因為佢幾年前整傷隻腳之後，依家不時血氣運行唔暢順，所以會去工聯會嘅中醫診所針灸，而有行動不便嘅街坊更不時同佢分享點受惠於工記嘅流動中醫服務添。九龍東嘅KK黃國健就話中醫係國粹，當佢遇到腸胃唔舒服或感冒時，就一定會睇中醫。
就連榮譽會長鄭耀棠都話中醫係固本培元，但佢從來都只會睇工聯會嘅中醫，因為有保證。人人都讚到工記嘅中醫服務係無敵咁，連兩年前幫工記搵到贊助人捐出小巴嘅工聯會「姑爺」、立法會進出口界議員「象哥」黃定光都話，自己有病嘅時候會睇中醫，就算睇完西醫，都會去食中藥調理吓。
話瞓吓覺就掂
但象哥嘅太太兼工聯會會長林淑儀就話，象哥應該去幫襯佢哋中醫診所嘅管理體重計劃，有中醫管住象哥有效啲喎。話過象哥又推銷埋工記嘅服務，會長呢招果然高。
佢哋講到天花龍鳳都冇用，工聯會嘅高層「吳揪得」就一於少理，勁有性格咁話自己好少睇醫生，因為中藥又唔係特別好飲，要屋企人煲藥又麻煩，唔單止中醫少睇，佢連西醫都少睇喎。咁有病點算呀？佢話瞓吓覺，摳好佢喎！吓！佢咁講，係咪想幫工聯會倒米？吳揪得因住畀人揪呀！
