垃圾回收欠扶持 庸官惟有送堆填

本來仲有第三條出路，垃圾唔可以轉眼消失啫，但係可以循環再用o架，將棄置之物回收再造變成有用之物，何止消除煩惱，簡直係造福地球。可惜嘅係，香港其中一件最難處理嘅垃圾正正就係現時嘅回收政策，不倫不類，唔湯唔水，如何將呢個廢物政策回收再造，問題本身已經係一件超級煩惱事。

回收政策點廢呢？嗱，環保組織舉咗一個入木三分嘅例子。原來喎，政府部門現時並無處理回收廢物指引o架，試過有承辦商將一車車嘅木卡板當垃圾，明明經過屯門環保園都過門而不入，寧願嘥油錢送去堆填區，你話幾咁荒謬吖。官老爺一方面叫市民回收廢物，一方面自己帶頭糟蹋資源，講出去都畀人鬧垃圾啦！

當然，政府唔止自己垃圾，推動民間回收廢料一樣廢到無倫。回收業界踢爆，現時塑膠、木材同玻璃等回收及經營成本過高，根本缺乏市場誘因，名叫可再造物料，實係冇得做廢料，大部分最後都係送晒入堆填區。業界警告，回收及再造業慘淡經營，兩年內或會出現倒閉潮，所以尋日發表聯署聲明，要求港府高抬貴手扶助一把。

講到呢度，大家明點解回收工作一塌糊塗啦。一來政策天殘地缺，既無禁止堆填區接收可循環廢料，又無指引強制政府部門回收廢料，咁樣搞廢物回收，收得檔啦。二來咯喎，回收再造業有名無實，回收嘅廢物唔係循環再造，而係送晒入堆填區，試問點可能唔「垃圾圍城」呢？

最好笑嘅係，官老爺話堆填區擴建不成就會垃圾圍城，原來不斷加重堆填區負荷嘅就係港府自己。正所謂，殺頭生意有人做，蝕本生意無人撈，環保官僚係時候研究加強扶助回收業嘞，萬一業界喺無利可圖之下紛紛關門大吉，到時要勞動官老爺將功贖罪執垃圾就唔好啦，係咪？

講開執垃圾，與垃圾為伍嘅「中環犀利哥」被強制清理「垃圾屋」。大家咪笑佢呀，如果港府嘅垃圾政策再垃圾落去，話唔定有日香港人人都係犀利哥。唔同嘅係大家應該無嗰份愛屋及「污」嘅另類癖好咁解。

一句講晒，環保官僚快快檢討回收政策，如果回收工作再係一塌糊塗，即係證明閣下轉廢為能失敗，最後下場惟有被人送入堆填區o架咋，叮！